Техеран, 12 јуни 2010 (МИА) - Иран во следните месеци ќе го открие напредокот остварен во својата нуклеарна програма, изјави претседателот на иранската Организација за атомска енергија Али Акбар Салехи.
- Во следните неколку месеци Иран ќе ги објави новите достигнувања постигнати во врска со производство на гориво за истражниот реактор во Техеран, изјави Салехи за весникот „Ресалат“.
Светските медиуми коментираат дека ова е на некој начин одговор на Техеран на одлуката на Советот за безбедност на ОН од 9 јуни да воведе четврти „пакет“ санкции кон Иран. Со Резолуцијата 1929 на СБ се проширува списокот на поединци, компании и организации на кои ќе им бидат замрзнати средствата, како и списокот на производи чиј извоз во Техеран е забранет.
Од 15 членки на Советот за безбедност, за резолуцијата гласаа 12, а Либан беше воздржан. Против беа Бразил и Турција чии амбасадори пред самото гласање потсетија на напорите на своите влади кои во мај успеаја да постигнат договор со Техеран за отстранување на одредени количини нуклеарен материјал од Иран, но тоа не беше земено предвид кога резолуцијата беше доставена до Советот за безбедност.
Советот за безбедност на ОН од 2006 година донесе три резолуции за санкции кон Иран, но ниту една не успеа да ги наруши плановите на иранската нуклеарна програма. За тие планови Западот смета дека се со цел производство на атомско оружје, додека Техеран тврди дека неговата цел е само производство на електрична енергија.