Бишкек, 12 јуни 2010 (МИА) - Киргистан побара од Русија помош за справување со ситуацијата во јужниот дел на земјата, каде од четвртокот има немири во кои според последните информации загинале 50 лица.
Лидерот на привремената Влада на Киргистан Роза Отунбаева изјави дека ситуацијата во последно време во градот Ош нагло се влошила и може да има непредвидливи последици.
- Потребно ни е мировно вклучување на воени сили од друга земја. Ние побаравме таква помош од Русија. Веќе потпишав писмо со молба за укажување на таква помош адресирано до претседателот Димитриј Медведев, рече Отунбаева.
Таа додаде дека Киргистан во секој момент е подготвен да започне преговори со Русија за нејзина мировна мисија во јужниот киргистански град Ош.
- Сега го чекаме одговорот од Руската Федерација, истакна Отунбаева и изрази увереност дека руските власти ќе одговорат позитивно на молбата на Киргистан со цел да се воспостави контрола во немирната област.