Сантјаго, 7 октомври 2010 (МИА) - Спасувачкиот тунел, што се копа за да ги извлече од под земја блокираните 33 чилеански рудари, ќе биде готов во сабота, соопшти министерот за рударска индустрија Лауренсе Голборне, цитиран од американските медиуми.
Вадењето на рударите на површината може да почне во следните два до десет дена во зависност од техничката оценка на ризикот.
Рударите се наоѓаат на околу 620 метри под земјата.
Кога точно ќе почне вадењето ќе зависи од тоа дали карпите на тунелот ќе треба да се засилат за да се избегне уривање на скалите или другите пречки по патот на спасувачката капсула, која треба да ги извади рударите на површината.
Внесувањето на потпорите, исто така, создава опасност од разурнувања или запушување на тунелот, ако потпорите се скршат.
Одлуката ќе се донесе откако во тунелот биде внесена видеокамера за разгледување на состојбата на карпите, прецизира министерот.