Сеул/Вашингтон, 24 ноември 2010 (МИА) - Јужна Кореа и САД во следните денови ќе изведат заеднички воено-поморски маневри во Жолто море, во кои ќе учествува и нуклеарниот носач на авиони „Џорџ Вашингтон“, откако севернокорејската артилерија гранатираше јужнокорејски остров и уби две лица, соопштија светските агенции.
Претседателите на САД и Јужна Кореа Барак Обама и Ли Мјун-бак телефонски се договорија да ја продолжат тесната соработка во областа на безбедноста во следните денови.
Сеул соопшти дека последната воена вежба ќе почне на 28 ноември (недела) и ќе трае до 1 декември.
Маневрите имаат чисто одбранбен карактер и се планирани пред вчерашниот инцидент, соопшти американската команда.
Обама го увери јужнокорејскиот колега дека САД стојат „рамо до рамо“ со својот близок сојузник и ќе работат со меѓународната заедница за да обезбедат широка осуда на севернокорејскиот напад.
Ова беше најголемиот напад на Северна Кореа против јужниот сосед по Корејската војна од 1950 до 1953 година.
Јужнокорејскиот министер за одбрана Ким Те-јон изјави дека, според него, севернокорејскиот напад е обид на властите во Пјонгјанг да ја затегнат контрола внатре во земјата во услови на предавање на власта.