Сеул, 25 ноември 2010 (МИА) - Северна Кореја при нападот на јужнокорејскиот остров Јонпјеонг користела оружје со термовоздушна смеса, кое има поголема моќност, изјави извор од вооружените сили на Јужна Кореја.
- По анализата на трагите од оружје на островот утврдивме дека е користена и специјална опрема, истакна истиот извор.
Според него Северна Кореја користела таков вид на оружје за да убие колку е можно повеќе луѓе и да предизвика пожари.
При експлозија на такво оружје се зголемува силата на бранот на експлозијата. Сеул претпоставува дека Северна Кореја таков вид оружје разработиле уште во 1985 година.
Во меѓувреме јужнокорејските медиуми јавија дека севернокорејскиот лидер Ким Џонг-ил и неговиот син наследник Ким Џонг-ун ја посетиле артилериската база, од која е нападнат јужнокорејскиот остров, неколку часа пред нападот. Се претпоставува дека Ким Џонг-ил лично дал наредба за отворањето оган.