Тел Авив, 6 декември 2010 (МИА) - Едно 14-годишно момче од регионот на Кармел денеска призна дека фрлил дел од запален јаглен во шума и така предизвикал пожар кој се претвори во најголемата огнена стихија во историјата на Израел.
Полицијата изутринава го уапси момчето, кое призна дека пушел наргиле во шумата и подоцна фрлил жарче, кое ги зафатило лисјата и сувите гранки.
Тој изјавил дека бил зачуден поради тоа што се случило, по што се вратил во училиштето и никому не кажал што направил. Момчето утре ќе биде изведено пред суд во Хаифа, каде ќе му биде продолжен притворот.
Претходно денеска судот ослободи две момчиња, исто така тинејџери, кои биле осомничени дека го предизвикале катастрофалниот пожар. Тие биле уапсени во саботата, а живеат во селото Усуфија, во близина на планината Кармел. Нивниот татко изјави дека тие не се одговорни за предизвикувањето на пожарот, нагласувајќи дека огнот избил неколку километри подалеку од нивната семејна куќа.
Израелскиот полициски инспектор Давид Коен во саботата истакна дека пожарот избувнал од невнимание и дека не е подметнат. Во огнената стихија загинаа 42 лица, а повеќе од 5.000 хектари шумско земјиште се уништени.
Пожарот е изгаснат изутринава по 82 часа надчовечки напор на пожарникарите.