Каиро, 29 јануари 2011 (МИА) - Египетскиот претседател Хосни Мубарак во синоќешното интервју за државната телевизија побара од Владата да поднесе оставка.
Тој најави социјални, економски и политички реформи во Египет.
- Антиовладините протести се дел од заверата да се дестабилизира Египет и да се уништи легитимитетот на режимот, наведе Мубарак.
Според лекарски извори во вчерашните протести во египетските градови Суец и во Каиро загинаа најмалку 18 луѓе, а повеќе од илјада се повредени.
- Ситуацијата е во сигурни раце, во рацете на претседателот Хосни Мубарак и тој ќе дејствува, изјави доцна синоќа пртетседателот на Парламентот, Фати Сорур.
Тој истакна дека Парламентот утре ќе ја одржи редовната седница на која ќе биде повикан и премиерот Ахмед Назиф.
Во меѓувреме, американскиот претседател Барак Обама го повика египетскиот колега Мубарак да се воздржи од насилство кон демонстрантите и да преземе „конкретни чекори“ за зајакнување на правата во Египет.
- Сигурно претстојат тешки денови, но САД ќе продолжат да се залагаат за правата на египетскиот народ и да работаат заедно со египетската Влада за поправедна, послободна и иднина поисполнета со надеж, истакна Обама.
Пред обраќањето на Обама, портпаролот на Белата куќа, Роберт Гибс најави дека американската администрација, во зависност од одговорот на Мубарак на демонстрациите, би можела да ја укине годишната помош за Египет во висина од 1,5 милијарди долари.