Каиро, 9 февруари 2011 (МИА) - Светските агенции јавуваат за повеќе загинати и повредени демонстранти во повеќе места низ Египет, во најновиот бран судири меѓу полицијата и нив, што почнаа од вчера, а денеска веќе се разгореа.
Еден демонстрант е убиен и неколкумина се ранети денеска во судирите меѓу силите за безбедност и околу 3.000 демонстранти во египетската провинција Вади ал Гадид, пренесоа британските медиуми.
Судирите почнале уште вчера и се уште траат.
Ова се веројатно првите судири меѓу полицијата и протестантите откако египетските полицајци се повлекоа од улиците, откако на 28 јануари тие ги нападнаа, изгазија и гаѓаа со гумени куршуми демонстрантите.
Ова се првите антивладини протести воопшто во провинцијата Вади ал Гадид, разместена на околу 500 километри јужно од Каиро, посочуваат агенциите.
На плоштадот „"Тахрир“ во главниот град денеска повторно се собраа илјадници луѓе, кои и натаму инсистираат на оставка на претседателот Хосни Мубарак. Армиски единици и тенкови се разместени околу плоштадот.
Стотици демонтстранти излегоа по улиците на градовите Ариш и Шејх Звејд во северен Синај, каде во последните две недели имаше масовни протести. Агенциите дополнуваат дека неколку стотини лица ја нападнаа зградата на градската администрација во Порт Саид и ја запалиле. Гневот на луѓето е предизвикан од веста дека 3.000 поплаки на граѓани за подобрување на нивните станбени услови биле фрлени на ѓубриште.
Според агенциите, во судирите во провинцијата Вади ал Гадид од вчера досега над 60 лица се повредени.
Француските медиуми соопштуваат за тројца убиени и 100 повредени во судирите меѓу полицијата и демонстрантите во Ел Харго, во јужен Египет, на 400 километри јужно од Каиро.
Силите на редот гаѓале врз демонстрантите со боева муниција, а тројца од нив починале од здобиените повреди. Како одговор на убиствата, толпата запалила седум административни згради.