Суровата нафта вчера доцна попладне поевтини на светските берзи, како реакција на оставката на египетскиот претседател Хосни Мубарак, по што попуштија тензиите околу можно пореметување во снабдувањето во регионот на Блискиот исток.
Цената на американската „лесна“ нафта за терминска испорака во март на Њујоршката берза падна за 23 центи на 86,50 долари за барел, а европската „брент“ нафта на берзата во Лондон поевтини за 24 центи на 101,11 долари за барел.
Египет не е еден од значајните светски производители на нафта, но протестите во земјата предизвикаа загриженост дека би можело да дојде до пореметување во транспортот на нафта низ Суецкиот канал и нафтоводот што е во близина, или дека немирите би можеле да се прошират во земјите-произведувачи на нафта на Блискиот исток.