Каиро, 14 февруари 2011 (МИА) - Илјадници демонстранти го напуштија плоштадот „Тахрир“ во центарот на Каиро, откако новите воени власти на Египет соопштија дека го распуштаат Парламентот и го суспендираат Уставот.
Високиот воен совет, кој ја презеде власта по повлекувањето на претседателот Хосни Мубарак, кој 30 години ја извршуваше функцијата, нагласи дека ќе остане на чело на државата во период од шест месец или додека да бидат спроведени парламентарните избори.
Овие одлуки беа поздравени од голем дел од демонстрантите, кои постепено го напуштаа плоштадот „Тахрир“, кој стана симбол на борбата против режимот на Мубарак.
Властите за денеска го прогласија неработен ден за банките со цел да се нормализира нивното функционирање, откако беше оневозможено работењето на главните државни банки.
Се очекува Високиот воен совет денеска да ги забрани штрајковите и да ги повика Египќаните да се вратат на работа.
Синовите на Мубарак, пак, речиси стигнале до тепачка во четвртокот кога нивниот татко го изнесе последното обраќање до нацијата во обид да ја задржи власта, пишува весникот „Ал Ахбар“.
Според весникот, кој е во државна сопственост, Ала Мубарак го обвинил својот помал брат Гамал дека го расипал владеењето на неговиот татко во последниот период, со тоа што вметнал свои бизнис пријатели во политичкиот живот.
- Наместо твојот татко да биде почитуван до крајот на неговиот живот ти помогна да се уништи неговиот имиџ, изјавил Ала.
Голем број Египќани сметаа дека Мубарак го подготвува својот син Гамал да го наследи на функцијата.