Триполи, 21 март 2011 (МИА) - Западните сили изутринава започнаа втор бран воздушни удари на Либија со цел да ја нападнат противвоздушната одбрана и да ги оневозможат либиските авиони да патролираат по небото, како и да го спречат напредувањето на силите лојални на либискиот лидер Моамер Гадафи кон градот Бенгази.
Авионите на САД, Велика Британија, Франција, Италија и Канада извршија бомбардирање со образложение дека акцијата продолжува и дека се отфрла прекинот на огнот кој либиската војска го објави доцна синоќа.
Западните медиуми објавија дека надвор од Бенгази се уште се забележуваат трупите на силите на Гадафи. Јагленисани тела, најмалку на 14 војници, лежат расфрлени по пустината и постои стравување дека преживеаните ќе се обидат да влезат во градот и да побараат засолниште од воздушните напади меѓу цивилното население.
Истовремено, во централниот дел на Бенгази, во источна Либија, има спорадични експлозии, а престрелки се слушаа синоќа на улиците во траење од околу 40 минути. Во тек е и офанзива на бунтовниците во градот Ал Завитина, јужно од Бенгази.
На запад, во градот Мисрата навлегоа тенковите на силите на Гадафи, бидејќи е погодена воена база во нападите на западните сили во саботата.
- Се водат борби меѓу бунтовниците и силите на Гадафи. Нивните тенкови се наоѓаат во центарот на Мисрата. Има толку многу жртви и не можеме да ги преброиме, потврди портпарол на бунтовниците.