Лондон, 22 март 2011 (МИА) - Еден американски воена авион, од типот Ф-15Е-Игл, се урнал во Либија, за време на синоќешните, трети по ред бомбардирања и ракетирања на цели на либиската територија, јавија лондонските телевизиски станици.
Како што јави дописникот на МИА од Лондон, авионот учествувал во синоќешното напаѓање на Либија и се верува дека имал проблеми со моторот. Пилотот со помош на падобран се спуштил на земјата и се тврди дека е на територијата што е под контрола на вооружените либиски бунтовници.
Засега нема официјална потврда за паѓањето на еден авион од антигадафи коалицијата.
За време на вчерашната дебата во британскиот Парламент неколкумина пратеници го прашаа премиерот Дејвид Камерон, што ќе се случи ако некој од британските пилоти се урнат, или бидат соборени на либиска територија, како и дали тоа ќе биде повод за истоварување и на британските трупи, за да се ослободи пилотот. Камерон не одговори на тие прашања, инсистирајќи дека мисијата се одвива во рамките на овластувањата од ОН.