Триполи, 25 март 2011 (МИА) - Во Триполи синоќа се слушнале пукотници, а либиската државна телевизија јави дека „западните авиони“ гаѓаат станбени квартови и воени зони.
Бунтовници во Мисрата соопштија дека синоќа го вратиле пристаништето и убиле 30 снајперисти на силите лојални на лидерот Моамер Гадафи.
Портпаролот на бунтовниците Абдуласет Абу Мзереик потврди дека бунтовниците ја повратиле контролата врз пристаништето Мисрата, откако ден претходно го освоија силите на Гадафи, со што беше блокирано снабдувањето со храна и лекови и оневозможено илјадници африкански мигранти да ја напуштат земјата со бродови.
Абу Мзереик наведе дека бунтовниците ги минирале зградите кои ги користеле снајперистите.
- Денеска имаше судири и нашите борци успеале да пронајдат начин да стигнат до снајперистите на покривите и убија 30 од нив, потврди Абу Мзереик синоќа.
Жителите тврдат дека иако воздушните напади на коалициските сили на воените мети на Гадафи во тој град траат веќе неколку дена, тие напади не успеале да ги запрат бомбардирањата кои ги извршуваат силите на Гадафи, како ниту неговите снајперисти и оти во судирите загинале повеќе десетици лица, додека над стотици се повредени.