Вашингтон, 26 март 2011 (МИА) - Американскиот претседател Барак Обама им потврди на конгресмените дека американските воени сили во Либија не тежнеат кон соборување на Моамер Гадафи од власт, туку сакаат да ги заштитат цивилите.
Белата куќа истовремено најави дека Обама, во врска со мисијата во Либија, ќе и се обрати на нацијата в понеделник.
Претседателот на САД вчера, по забелешката дека за операцијата во Либија не го консултирал соодветно Конгресот, одржа едночасовен конференциски разговор од Белата куќа со лидерите на Демократската и Републиканската партија.
Тој на конгресмените им зборувал околу плановите за префрлање на воената команда на НАТО и напредокот кој досега е постигнат во операцијата, соопшти Белата куќа.
Претседателот на претставничкиот дом, републиканецот Џон Бејнер, за време на разговорите истакна дека администрацијата на Обама мора да обезбеди транспарентност кога станува збор за американските воени цели во Либија, улогата на САД во акцијата и да одговори на кој начин е таа согласно целите на американската политика.
Голем број функционери од Демократската партија на Обама се против вклучувањето на САД во трета војна во муслиманскиот свет, по ангажирањето на земјата во Авганистан и Ирак.