Вашингтон, 7 април 2011 (МИА) - Детали од писмото на либискиот лидер Моамер Гадафи до американскиот претседател Барак Обама не се објавени, но Си-Ен-Ен извести повикувајќи се на извор од Белата куќа за најзначајните делови.
- Во писмото нема ништо ново, тоа беше молба за престанување на сојузничките воздушни операции. Немаше никакви понуди за евентуално отстапување на Гадафи, изјави тој, додавајќи дека тоа Вашингтон не го зема за сериозно.
Во писмото побарал да се прекине војната против малите луѓе од земјата во развој и смета дека бунтовниците се терористи и припадници на Ал Каеда.
- Повеќе сме повредени морално отколку физички поради тоа што ни го направивте. И покрај се, секогаш ќе бидеш наш син, наведува Гадафи во писмото. Додава дека се надева оти на следните претседателски избори ќе победи Обама.
- Ти си човек што има доволно храброст да ги поништи сите лоши и погрешни одлуки, се вели во писмото на Гадафи упатено до Обама.