Токио, 12 април 2011 (МИА) - Количеството на испуштената радијација од јапонската нуклеарна централа „Фукушима 1“ може да го надмине обемот од нуклеарната хаварија во Чернобил во 1986 година, изјави денеска претставник на компанијата оператор на нуклеарката ТЕПКО.
- Истекувањето на радијацијата не е целосно запрено. Нашата загриженост е дека таа може да ја надмине радијацијата од Чернобил, изјави претставникот на ТЕПКО.
Јапонија денеска го зголеми степенот на нуклеарната катастрофа во „Фукушима 1“ на максималниот седми степен според Меѓународната скала за нуклеарни инциденти. Седми степен, според досегашните оценки, имала само нуклеарната хаварија во Чернобил.
Досега нуклеарната криза во „Фукушима 1“ беше определена на петти степен од седумстепената Меѓународна скала за нуклеарни инциденти.
- Ова е прелиминарна оценка, која подлежи на потврда од Меѓународната агенција за атомска енергија, изјави претставник од јапонската Агенција за нуклеарна и индустриска безбедност.