Токио, 13 април 2011 (МИА) - Земјотрес со интензитет од 5,8 степени според Рихтеровата скала го погоди денеска североисточниот дел на Јапонија, а потресот е почувствуван и во Токио, соопшти Јапонската метеоролошка агенција.
Епицентарот на земјотресот бил во префектурата Фукушима.
Операторот на нуклеарната централа „Фукушима Даичи“ во тој дел на Јапонија, компанијата Токиско Електростопанство (ТЕПКО) соопшти денеска дека работниците не се евакуирани и оти работата во нуклеарниот комплекс продолжува нормално без разлика на земјотресот.
Иако земјотресот погодил област во близина на нуклеарката, работниците и натаму ја отстрануваат високо радиоактивната вода од објектот и го ладат базенот со истрошено нуклеарно гориво во централата, која претрпе големи оштетувања во разорниот земјотрес и цунамито, кои ја погодија Јапонија на 11 март.
ТЕПКО прецизираше дека се испумпува мошне загадената вода од подземните тунели, слични на ровови, во околното складиште внатре зградата на вториот реактор. Работата е почната синоќа и се проценува дека околу 200 тони загадена вода е префрлена во „кондензаторот“, каде пареата од реакторот се претвора во вода. ТЕПКО има цел до утре да префрли вкупно 700 тони радиоактивна вода од вториот реактор.
Според најновите податоци на јапонската полиција во катастрофалниот земјотрес и цунамито загинале 13.333 лица, а 15.150 се водат како исчезнати.