Берлин, 18 април 2011 (МИА) - Германската Влада ја разгледува можноста да префрли шест милијарди долари во замрзнати сметки на режимот на Моамер Гадафи во доверлива сметка на ОН, која ќе биде искористена за укажување хуманитарна помош во Либија, објави списанието „Шпигел“.
- ОН би можела да ги искористи тие средства, за да набави хуманитарна помош и да ги олесни страдањата на населението во цела Либија, предложил министерот за економија Рајнер Брудерле во документ, цитиран од Шпигел.
Министерот посочува дека одделни земји, кои замрзнале средства на либискиот режим, немаат законско право да ги доставуваат тие средства преку Либијците. Затоа Брудерле ја повикува и ЕУ да најде начин сите замрзнати средства на Гадафи во Европа да бидат префрлени на ОН.
Портпаролот на германското Министерство за економија ја потврди информацијата на „Шпигел“.
Минатата седмица министерот за планирање и финансии на Либија Абдулхафид Злитни изјави на прес-конференција дека во странски банки се замрзнати 120 милијарди либиски средства.