Њујорк, 16 мај 2011 (МИА) - Извршниот директор на Меѓународниот монетарен фонд (ММФ)
Доминик Строс-Кан беше изведен доцна синоќа од полициска станица во Њујорк, каде беше држен од саботата.
Со лисици на рацете, 62-годишниот Строс-Кан, кој е обвинет за сексуален напад врз собарка во хотел во саботата, беше одведен со автомобил во непознат правец. Тој не рече ништо пред многубројните новинари, кои го чекаа да излезе.
Адвокатот на Строс-Кан Вилијам Тејлор претходно изјави дека неговиот клиент се согласил да се подложи уште во недела вечерта на судската експертиза на барање на обвинителството, со цел собирање докази за случајот.
Шефот на ММФ вчера се јави пред судот во Њујорк за да одговара по обвинение за сексуално насилство против собарката.
Портпарол на полицијата изјави дека Строс-Кан не се користи со дипломатскиот имунитет. Тој може да се биде осуден на 20 години затвор, доколку се прогласи за виновен.
Во меѓувреме, наводната жртва на сексуалното насилство од страна на Строс-Кан го идентификува директорот на ММФ во полициска станица во Њујорк.
Триесет и двегодишната собарка во хотелот „Софител“ во градот го идентификувала Строс-Кан меѓу неколкумина мажи. Полицијата освен тоа, собрала докази во хотелската соба на шефот на ММФ, земајќи и елементи кои содржат ДНК.