Њујорк, 20 мај 2011 (МИА) - На поранешниот извршен директор на Меѓународниот монетарен фонд, Доминик Строс-Кан денеска судот во Њујорк му одобри да излезе од притвор со кауција од милион долари и за обвинувањата за обид за силување, да се брани од домашен притвор.
Неговото движење ќе биде електронски контролирано. Дваесет и четири часа мора да има до себе вооружен чувар кој сам ќе го плаќа и со пет милиони долари ќе гарантира дека нема да ги напушти САД. Следното сослушување ќе биде на 6 јуни кога Строс-Кан и официјално ќе се изјасни за обвинувањата.
Според неговиот адвокат, тој отфрла обвинувања за криминален сексуален чин, силување, сексуално злоставување, недозволено задржување и принудно допирање, поради кои му се заканува казна затвор од 25 години.
Строс-Кан беше уапсен во саботата на њујоршки аеродром и обвинет за сексуален напад врз собарка во хотелот Софител во Њујорк. Поради тие обвинувања, поднесе оставка на местото извршен директор на ММФ.