Телевизиската станица “Араи“ со седиште во Сирија, која го поддржува симнатиот либиски лидер Моамер Гадафи, потврди дека неговиот син Камис е убиен на 29 август, југоисточно од главниот град Триполи.
Воени функционери на Преодниот национален совет во август објавија дека Камис е убиен во Тархун и закопан во Бани Валид, но тоа до сега го немаа потврдено извори блиски до Гадафи.
“Араи“ објави дека во борби со силите на Советот во градот Тархун, оддалечен 90 километри од Триполи, се убиени Камис Гадафи, кој командувал со елитната воена бригада и Абдулах Сенуси кој бил шеф на разузнавачката агенција.
Телевизијата, која емитуваше говорни пораки на Гадафи и на неговиот портпарол откако бунтовничките сили го зазедоа Триполи, објави фотографии од Камис и Сенуси пропратено со читање стихови од Куранот, што е традиционален начин на оплакување на починатите.
Меѓународниот кривичен суд во Хаг во август, освен за Гадафи и неговиот син Саиф ал Ислам одобри налог за апсење и за Абдулах Сенуси заради злосторства против човештвото. Тогаш се споменуваше можноста на листата на најбарани злосторници да се најде уште еден син на Гадафи, Камис, чија бригада е осомничена за убиство на десетици заробеници во Триполи.