Поранешниот либиски лидер Муамар Гадафи е упасен денеска во градот Сирт. Од Преодниот Национален совет на Либија соопштуваат дека Гадафи бил тешко ранет во акцијата на апсењето.
- Тој е фатен. Гадафи е тешко ранет, но е сеуште жив, изјави Мохамед Леит, претставник на новите либиски власти.
Либиската преодна власт денеска го зазеде Сирт, последното упориште на силите лојални на Гадафи. ББЦ јави дека ситуацијата е многу сложена. Последниот напад бил утрово и траел 90 минути. Војската на Гадафи го држеше градот под контрола со недели откако нивниот лидер го напушти Триполи.
Преодната власт рече дека новата влада ќе биде формирана за месец, а моменталната администрација ќе поднесе оставка.
Вршителот на должност премиер на Либија вчера изјави дека соборениот лидер Моамер Гадафи се обидува да собере борци од другите африкански земји и оти се подготвува за бунт со цел да ја врати власта во земјата.
- Има информации дека 68 автомобили со најмалку осум војници во секој од нив ја преминале либиската граница со Мали и дека Гадафи се крие во јужната пустина, изјави во Триполи Махмуд Џибрил.
Тој истакна дека Гадафи склучил договор со племето Хамад, што талка на границите меѓу Чад, Судан и Либија да му обезбедат 12.000 војници, кои ќе влезат на територијата на Либија и ќе започнат борба против новите власти.