Женева, 21 октомври 2011 (МИА) - Канцеларијата на високиот комесар на ОН за човекови права денеска побара спроведување целосна истрага за смртта на поранешниот либиски лидер Моамер Гадафи.
- Не е сосема јасно како тој починал. Потребна е истрага, изјави во Женева портпаролот на Канцеларијата, Руперт Колвил, додавјќи дека се „доста збунувачки“ аматерските видео снимки објавени во јавноста, кои прво покажуваа дека заробениот Гадафи е жив, а потоа дека е мртов.
Тој најави дека експертскиот тим на ОН што ги истражува злосторствата извршени во Либија, најверојатно ќе ја испита смртта на Гадафи, по што може да предложи спроведување меѓународна или национална истрага за целиот случај.
Според Колвил, жртвите на „42-годишното деспотско владеење“ на Гадафи заслужуваат да видат судски процеси против лицата одговорни за кршење на човековите права.