Мисрата, 25 октомври 2011 (МИА) - Поранешниот либиски лидер Моамер Гадафи денеска пред изгрејсонце беше погребан на тајно место во либиската пустина, соопшти портпаролот на Преодниот национален совет на Либија, Ибрахим Бејталмал.
Тој нагласи дека заедно со Гадафи биле погребани и неговиот син Мутасим и поранешниот либиски министер за одбрана Абу Бакр Јунис.
Според Бејталмал, на погребната церемонија на која исламски духовници прочитале молитви, присуствувале роднини на починатите и претставници на либиските власти.
- На меѓународните организации кои ќе сакаат да ги видат гробовите ќе им биде дозволено да дојдат до нив, рече Бејталмал.
Телата на Гадафи, на неговиот син и на Јунис, кои беа убиени во четвртокот, неколку дена стоеја во еден ладилник во Мисрата.
Либиските власти претходно најавија дека Гадафи ќе бидат погребан на тајно место со цел „да се избегнат акти на вандализам или претворање на гробот во место на поклонение“ на приврзаниците на соборениот либиски лидер.