Париз, 25 октомври 2011 (МИА) - Поранешниот либиски лидер Моамер Гадафи на 5 август му напишал писмо на својот некогашен пријател, италијанскиот премиер Силвио Берлускони, во кое го моли да го запре бомбардирањето на НАТО, во кое гинат Либијците и нивните деца, пишува весникот „Пари мач“.
Во писмото Гадафи признава дека е изненаден од однесување на Белускони, со кој склучил договор за пријателство, кој е во интерес на Италијанците и Либијците.
- Драг Силвио, очекувам од тебе сепак да се заинтересираш за фактите и да се обидеш да посредуваш, пред да ја поддржиш таа војна, вели Гадафи.
- Не ти забележувам за нешто, за што не си одговорен, бидејќи добро знам дека не го поддржуваш тоа злодело, кое не ти користи ниту на тебе, ниту на италијанскиот народ, нагласи поранешниот либиски лидер.
- Верувам дека се уште имаш можност да се вратиш назад и во преден план да ги ставиш интересите на нашите народи, му порачал Гадафи на Берлускони.
Во писмото Гадафи го повикува Берлускони да ги запре бомбардирањата, со кои се убиваат цивили во Либија.
- Зборувај со твоите пријатели и со вашите сојузници да ја спречат таа агресија врз мојата земја. Се надевам дека семоќниот Бог ќе те води на патот на правдата, напишал Гадафи.
Писмото им било предадено на италијанските власти на почетокот на август од двајца Италијанци, пријатели на Гадафи.