Мисрата, 25 октомври 2011 (МИА) - Поранешниот либиски лидер Моамер Гадафи последните денови ги помина криејќи се во засолништа во Сирт. Тој беше во расположение од очај до бес, изјави поранешниот шеф на неговото лично обезбедување Мансур Дао.
Тој наведе дека Гадафи, неговиот син Мутасин и околу дваесетина најлојални следбеници, последните денови речиси биле отсечени од светот бидејќи се криеле во напуштени куќи без телевизија, телефон и електрична енергија,
Ги менувале засолништата на секои четири дена, а за осветлување користеле свеќи.
- Беше под стрес, понекогаш беше лут, а понекогаш ќе збеснеше. Сепак, воглавно беше само тажен или лут, наведе Дао, кој во моментот е во притвор.
Дао посочува дека Гадафи времето го поминувал читајќи, пишувајќи или варејќи чај. последните денови од опсадата на Сирт се соочиле и со недостиг на храна.
- Тој не водеше борба, тоа го правеа неговите синови, посочи Дао.
Гадафи е убиен во четвртокот во родниот град Сирт, под се уште неразјаснети околности, последниот бастион на неговиот режим.