Ерусалим, 8 ноември 2011 (МИА) - На Иран треба да му бидат воведени парализирачки меѓународни санкции, изјави израелскиот министер за надворешни работи Авигдор Либерман за денешното издание на весникот „Маарив“.
- Меѓународната заедница треба да му воведе на Иран многу сурови и парализирачки меѓународни санкции, истакнал Либерман на затворена седница на парламентарните комисии за надворешни работи и одбрана.
Според него, овие санкции треба да се однесуваат на Иранската централна банка и на извозот на нафта од земјата по претстојното објавување на извештајот на Меѓународната агенција за атомска енергија (МААЕ) за нуклеарната програма на Техеран.
- Ако САД не преземат чекори во правец на строги санкции против Иран, тоа ќе значи дека Американците и Западот го прифаќаат нуклеарен Иран, додаде шефот на израелската дипломатија.
Израелскиот претседател Шимон Перес неодамна предупреди дека „можноста за воен напад врз Иран е поблиска од дипломатско решение“.