Техеран, 8 ноември 2011 (МИА) - На Иран „не му треба атомска бомба“ за да им се спротивстави на САД, а Техеран повеќе сака да се користи со ум за да ги отстрани заканите од Вашингтон, изјави денеска иранскиот претседател Махмуд Ахмадинеџад.
- Доколку Америка сака да се конфронтира со иранската држава, тогаш сигурно ќе зажали поради одговорот на Иран, истакна Ахмадинеџад за државните медиуми, предупредувајќи дека неговата земја нема да прифати било кое обвинување на сметка на својата нуклеарна програма.
- Историјата покажала дека секој што дејствувал против иранскиот народ, зажалил поради тоа, нагласи иранскиот претседател.
Коментарот на Ахмадинеџад доаѓа пред објавувањето на извештајот на Меѓународната агенција за атомска енергија (МААЕ), за кој дипломатите сметаат дека ќе изнесе докази за многу можна „воена димензија“ на иранската нуклеарна програма.
Иранскиот претседател нагласи дека е „целосна дрскост“ што САД го обвинуваат Иран дека настојува да развие нуклеарно оружје кога веќе поседува илјадници парчиња сопствено.
- Ако мислите дека притискајќи ја иранската нација можете да ја смените ситуацијата во светот, тогаш многу се лажете. Велат дека Иран настојува да произведе атомска бомба. Но тие треба да знаат дека нам не ни треба бомба. Ние пред се ќе постапиме внимателно и логички, објасни Ахмадинеџад.
Тој, исто така, истакна дека шефот на МААЕ Јукио Амано е американска марионета, „бидејќи не ги објавува извештаите за американските и нуклеарните арсенали на нивните сојузници“.