Каиро, 22 ноември 2011 (МИА) - Египетските активисти повикаа на масовни демонстрации, откако 35 лица се убиени, а повеќе од илјада се повредени во судирите меѓу полицијата и демонстрантите во Каиро изминатите три дена.
Неколку илјади лица ја минаа ноќа на плоштадот Тахрир, откако египетската Влада синоќа соопшти дека поднесува оставка.
Владиниот портпарол, Мохамед Хегази изјави дека Владата ја поднела својата оставка до Врховниот совет на вооружените сили, но дека таа ќе продолжи да ги извршува своите задачи се додека нејзината оставка не биде прифатена поради „сериозноста на ситуацијата во земјата“.
Се проценува дека околу 20 илјади лица се собрале на плоштадот Тахрир, откако синоќа Владата соопшти дека поднесува оставка.
Врховниот воен совет се уште не се изјаснил дали ја прифаќа оставката, иако телевизијата Ал Џазира повикувајќи се на свои извори јави дека е прифатена оставката на кабинетот на премиерот Есам Шарах.
До судирите на улиците на Каиро дојде поради одолговлекувањето на воените власти, кои го презедоа управувањето со земјата по соборување на режимот на Хосни Мубарак, да ги предадат овластувањата на цивилните власти. Првиот круг од парламентарните избори е закажан за 28 ноември, а вториот за март 2012 година.