Американскиот војник, кој е осомничен дека минатата седмица убил 16 авганистански цивили, меѓу кои имало жени и деца, се вика Роберт Бејлс (38) и е сместен во најпознатиот воен затвор во САД во Форт Левенворт во државата Канзас.
Воени извори, на кои се повикуваат американски медиуми, го откриле името на наредникот во американската војска, иако неговиот идентитет официјално ќе биде соопштен дури кога против него официјално ќе биде покренато обвинение.
Бејлс е татко на две деца од три и четири години и важи за воен ветеран, бидејќи престојот во Авганистан му бил четврти престој во воена зона. Претходните три мисии престојувал во Ирак.
Неговото семејство вели оти тој никогаш не покажувал знаци на бес или агресија, и оти не бил непријателски расположен кон муслиманите. Тие се во целосен шок, тој всушност имал благ карактер, вели неговиот адвокат Џон Хенри Браун.
Адвокатот додава дека тој бил ранет двапати во Ирак и оти тогаш му е отстрането дел од од стапалото, додека во вториот случај добил повреди на главата.
Тој вели дека Бејлс после третата тура во Ирак мислел дека повеќе нема да се враќа во воена зона, откако дошол дома во Сиетл.
- Мислел дека ќе работи во воениот отсек за регрутација. Прво му е кажано дека нема да се враќа назад, а подоцна дека сепак мора да оди за Авганистан, со што не бил воодушевен, додава неговиот адвокат.
Бејлс се вратил во Авганистан во декември, а на 1 февруари е префрлен во базата во близина на Кандахар, каде се и случил масакрот.