Кито, 15 август 2012 (МИА) - Претседателот на Еквадор Рафаел Кореа ги демантира вчера тврдењата на британскиот весник „Гардијан“ дека неговата земја се подготвува да му даде азил на основачот на Викиликс Џулијан Асанж, кој околу два месеци се крие во еквадорската Амбасада во Лондон.
- Гласините за доделување азил на Асанж се невистинити. Се уште не е донесена никаква одлука за тоа прашање. Чекам извештај од Министерството за надворешни работи, напиша Кореа на неговата страница на Твитер.
„Гардијан“ претходно вчера објави на својата Интернет страна дека Еквадор ќе му даде азил на Асанж. Весникот се повика на висок функционер на Еквадор.
Еквадорскиот претседател во понеделникот вечерта изјави за националната телевизија дека до крајот на неделата ќе одговори на барањето за азил на основачот на Викиликс. Кореа прецизираше дека планира денеска да разговара со еквадорските дипломати во Лондон за ова прашање, со цел да ја донесе најдобрата одлука.
Асанж (41) е обвинет од шведското правосудство за силување и сексуален напад врз две жени во Шведска. На 19 јуни тој се скри во Амбасадата на Еквадор во Лондон, каде поднесе барање за азил, со цел да ја избегне екстрадицијата во Шведска. Тој стравува дека доколку биде екстрадиран во Шведска, ќе биде предаден на САД, каде му се заканува доживотен затвор поради објавување на американски тајни дипломатски документи.