Милано, 5 ноември 2012 (МИА) - Судбината на американските претседателски избори е во рацете на жените кои не се во брак, пишува италијанскиот весник „Кориере дела сера“.
Според испитувањата на јавното мислење, 63 проценти од немажените Американки го поддржуваат Барак Обама, а само 23 отсто се изјасниле за Мит Ромни.
Во САД бројот на жените кои живеат сами изнесува 55 милиони, тврди весникот, кој потсетува дека Обама ги привлекол слободните жени со помош на актерката Ева Лонгорија, која ја имаше главната улога во серијалот „Очајни домаќинки“.
Сопругата на кандидатот на републиканците Ен Ромни за време на конференцијата во Тампа пред два месеца нагласи дека таа и нејзиниот сопруг, исто така, ги сакаат жените, но потоа потврди дека станува збор за сопругите и мајките, кои имаат огромни обврски во семејствата.