Њујорк, 28 октомври 2013 (МИА) - Американската Агенција за национална безбедност (НСА) го прекинала прислушувањето на мобилниот телефон на германската канцеларка Ангела Меркел и на другите светски лидери откако Белата куќа разбрала за таквите програми, објави „Волстрит џурнал“.
Американски и британски медиуми летово објавија информации за тајните програми на НСА за следење, кои беа проследени од поранешниот разузнавач Едвард Сноуден. Потоа Белата куќа почна внатрешна истрага, која покажа дека биле прислушувани телефоните на околу 35 претседатели. Белата куќа потоа решила да го прекине прислушувањето на некои лидери, меѓу кои и Меркел.
„Волстрит џурнал“ наведува дека не знае за кои лидери било прекинато прислушувањето освен за Меркел.
Весникот тврди и дека претседателот на САД, Барак Обама не знаел за програмите за прислушување на телефоните на светските лидери поради тоа што НСА во исто време спроведувала голем број операции и не го известувала претседателот за секоја од нив.
- Конкретните одлуки се донесуваат на ниво на НСА, а претседателот не ги потпишува. Но, сега се преразгледува таквата пракса, наведува „Волстрит џурнал“.