Ханој, 11 ноември 2013 (МИА) - Тајфунот Хаијан стигна на брегот на Виетнам, откако претходно предизвика огромни штети на Филипините, однесе над 10.000 животи и предизвика големи разорувања, соопштија американски метеоролози.
Американскиот заеднички центар за предупредување на опасност од тајфуни соопшти дека тајфунот стигнал до Виетнам на околу 160 километри источно и југоисточно од престолнината Ханој.
Бурата, која значително ослабна откако премина над Филипините за време на викендот, го удри брегот на Виетнам со ветрови со брзина од 120 километри на час, соопшти Американскиот центар со седиште на Хаваи.
Над 600.000 луѓе се евакуирани за време на викендот додека тајфунот се приближувал кон Виетнам.
Бурата во неделата го промени курсот поради што се евакуирани уште околу 52.000 луѓе во северните провинции по должина на брегот.