Вашингтон, 17 март 2014 (МИА) - Исчезнатиот малезиски авион би можел да слета на 643 писти во реонот на двата коридора, каде се уште се трага по леталото, објави американското радио WNYC.
Тие писти се наоѓаат во 26 различни земји, од Австралија до Монголија и од Микронезија до Малдиви.
Авионот исчезна на 8 март на пат од Куала Лумпур за Пекинг. Податоците покажуваат дека некој од авионот го исклучил системот за врска со Земјата. Се претпоставува дека тоа се случило на половина пат од Малезија за Виетнам и потоа леталото го сменило курсот. Експертите оценуваат дека авионот потоа летал повеќе од седум часа, но не е познато каде стигнал.
Во потрагата по малезискиот авион во двата можни коридори - на север преку Тајланд до Казахстан и на југ преку Индонезија до јужниот дел на Индискиот Океан учествуваат 25 земји.
Американското радио наведува оти е малку веројатна хипотезата дека авионот некаде слетал.