Њујорк/Женева, 11 април 2014 (МИА) - Обединетите нации ги прифатија барањата на Палестинците за придружување кон 13 меѓународни договори, а швајцарската Влада соопшти дека можат да ја потпишат и Женевската конвенција, со која се регилирани меѓународните правила за војување, кои ја покриваат и окупацијата.
Генералниот секретар на ОН, Бан Ки-мун синоќа се согласил Палестинската автономна управа да ги потпише 13 меѓународни конвенции и за тоа ги информирал сите 193 земји-членки на Светската организација.
Швајцарското Министерство за надворешни работи, пак, денеска соопшти дека „пристапот на државата Палестина кон конвенциите е во сила од 2 април“.
Израел смета дека Женевската конвенција, која забранува населување на окупирани подрачја, не се однесува на палестинските територии на Западниот Брег и во Појасот Газа, бидејќи тие не се меѓунардоно прифатени како држава.
Палестинците овие барања ги поднесоа откако Израел одби да ја ослободи четвртата и последна група од 26 палестински затвореници, затоа што палестинската страна не се согласи со продолжување на мировните преговори по истекот на поставениот рок за постигнување спогодба, а тоа беше крајот на април.
Палестинскиот претседател Махмуд Абас тогаш ги потпиша писмата со барање за потпишување на 15 меѓународни конвенции, од кои 13 во ОН, една во Женева и една во Холандија.
Палестинскиот амбасадор во ОН, Ријад Мансур најави дека на 2 мај „Палестина официјално ќе стане потписник на 13 од 15 конвенции“ и дека е подготвена да поднесе барања за зачленување во повеќе агенции на Светската организација и да стане потписник на други конвенции и спогодби во зависност од израелските акции.