Манила, 15 април 2014 ( МИА ) – Најмалку 3000.000 филипинци се соочени со депортација од САД, бидејки работат без документи, пишува денешниот Манила Тајмс. Најголем дел од овие илегални работници во САД дошле по минатогодишниот катастрофален тајфун „ Јоланда’’, кога им било дозволено привремено да се сместат кај роднини и пријатели.
Филипинскиот сенатор Бен Евардоне, кој заедно со триесетмина американски сенатори ја води акцијата за легализација на престојот на филипинските државјани во САД, вчера имал средба со американскиот амбасадор во Манила Филип Голдберг, кој му рекол дека се надева дека Стејт Департментот најверојатно ќе донесе одлука на филипинците да им се додели статус на „ привремено заштитени граѓани ’’, што значи и продолжување на нивниот престој во САД.
Според медиумите во Манила, добрата вест за филипинските илегални рабптници најверојатно ќе ја донесе лично претседателот Обама, кој на крајот на месецов ќе биде во официјална посета на Филипините. Со оглед на најновото, повторно, затоплување на односите меѓу САД и Филипините, аналитичарите очекуваат дека американската администрација ќе донесе позитивна одлука за филипинското барање.
Манила Пост пренесува дека само во декември 2013 година легалните и илегалните филипински работници од САД дома испратиле 2,6 милијарди долари, над 12 посто повеќе во споредба со истиот месец претходната година.
Покрај филипинските илегалци, на мета на емиграционите власти на САД се бегалци од Сирија, Сомалија, Хондурас, Хаитите и Салвадор.