Сеул, 16 април 2014 (МИА) - Над 300 лица се исчезнати и само 164 се евакуирани по потонувањето на јужнокорејски ферибот во близина на југозападното крајбрежје на земјата, соопшти претставник на крајбрежната стража.
Тоа значи дека бројот на исчезнати е многу поголем, а бројот на евакуирани далеку помал, од претходно објавеното.
Првично беше соопштено дека најмалку две лица се загинати, 13 се повредени и 107 се водат за исчезнати, додека евакуирани се 368 лица.
За време на несреќата на фериботот имало 477 лица, во најголем дел деца од средно училиште.
Бродот со 325 ученици на екскурзија, испратил повик за помош изутринава околу девет часот по локално време, на 20 километри од островот Бјеонпонг, соопшти крајбрежната стража на земјата. Траектот целосно потонал за околу два часа. Јужнокорејската морнарица распореди 22 брода и еден хеликоптер за спасување и потрага по исчезнатите.