Техеран, 23 јули 2014 (МИА) - Преговорите меѓу Техеран и Западот за иранската нуклеарна програма, кои се продолжени за уште четири месеци, ќе продолжат на почетокот од септември, соопштија иранските власти.
Иран и Групата 5 плус еден (петте постојани земји-членки на Советот за безбедност и Германија) постигнаа договор да ги продолжат преговорите во следните четири месеци со цел да се постигне договор за иранската нуклеарна програма.
Претходно 20 јули беше краен рок за завршување на долгорочните преговори со кои треба да биде решен десетгодишниот спор со Техеран.
- Продолжувањето на преговорите сведочи за позитивната атмосфера, изјави портпаролката на ирнското Министерство за надворешни работи Марзијех Афхам на неделната прес-конференција.
Таа истакна дека најголемите несогласувања меѓу двете страни се однесуваат на капацитетот за збогатување на ураниумот.
Техеран се обврзал дека ќе го конвертира или ќе го разреди ураниумот збогатен со 20 отсто во согласност со привремениот договор, склучен во ноември со шестте светски сили - САД, Русија, Кина, Велика Британија, Франција и Германија.