Брисел, 23 јули 2014 (МИА) - Европската унија наметна санкции против 12 лица и структури, поврзани со сирискиот одбранбен и нафтен сектор, пренесе ДПА.
Санкциите вклучуваат забрани за патувања и замрзнување на нивните сметки.
Досегашните ограничувачки мерки на ЕУ, што имаат за цел да го прекинат крвопролевањето во веќе тригодишната граѓанска војна во Сирија, имаа мал ефект, забележува ДПА.
Меѓу лицата кои ќе станат цел на новите санкции е полковникот Сухаил Хасан, кој според ЕУ е одговорен за репресии врз цивилното население, Амр Арманази, генерален директор на Сирискиот центар за научни истражувања, каде се претпоставува дека се извршувани тестови со хемиско и биолошко оружје и со ракетни технологии, како и бизнисменот Хашим Анвар ал Акад, сопственик на нафтени и гасни компании.
Меѓу деветте правни лица, врз кои ќе се наметнат ограничувања, се компанија за трговија со нафта, стационирана во Либан, и трговска компанија со седиште во Египет, кои според ЕУ ги организирале тајните испораки на нафта за сирискиот режим.
Цел на санкциите ќе бидат и рафинерии, како и две организациски целини на сириското Министерство за одбрана.