Иранскиот духовен лидер повика за уништување на израелскиот режим

Техеран, 24 јули 2014 (МИА) - Иранскиот духовен лидер, ајатолах Али Хамнеи повика за организирање референдум меѓу Арапите и Евреите во Израел, со цел да и се стави крај на „ционистичката држава“.

- Додека биде организирано гласањето и го чекаме крајот на овој крволочен режим, единствен начин да му се спротивставиме е силниот вооружен отпор, изјави Хамнеи.

Хамнеи и неговиот претходник ајатолах Рухола Хомеини одамна повикуваат за уништување на еврејската држава, главно преку референдум во регионот, каде Палестинците се мнозинство.

Во првиот официјален коментар по почетокот на израелската офанзива врз Појасот Газа, Хамнеи истакна дека „луѓето во регионот треба сами да ја изберат владата преку референдум и тоа ќе биде крајот на узурпацискиот режим“.

Првпат тој јасно изјави дека мисли на уништување на Израел, а не смрт на Евреите.

- Уништувањето на Израел е единствениот вистински лек, но тоа не значи уништување на Евреите во регионот, нагласи иранскиот лидер.