Џакарта, 25 јули 2014 (МИА) - Главниот град на Индонезија Џакарта, кој е втор по големина во светот со 28 милиони жители, следната недела нема да биде налик на вообичаеното секојдневие, бидеќи околу 10 милиони нејзини жители една недела ќе се вратат во селата и помалите градови од кои дошле во престолнината. Причина е крај на рамазанскиот пост и почеток на повеќедневните празници наречени Идул Фитри.
Ова е повеќегодишна традиција во Џакарта и другите поголеми градови во Индонезија. Бројната послуга од сите видови помош во домаќинствата, која речиси без исклучок работи и живее во џакартанските семејства по деновите на Рамазан добива седум слободни дена, кога сите заминуваат во своите вистински домови.
Од своевидниот егзодус на дојденците во Џакарта најмногу мака ќе видат бројните странски семејства кои ќе останат без послугата, па затоа наместо во куќите во кои живеат, странците ги опседнуваат хотелите и многубројните туристички центри на брегот на островот Јава.
Своевиден куриозитет на Џакарта е и „окупацијата“ на елитните хотели од страна на побогатите жители на мегалополисот. Со многу редуцирана послуга, без која тешко се опстанува, побогатите семејства се сместуваат во елитни хотели во самиот град, а тоа е и прилика богатите сопруги да ги покажат својата гардероба и скапоцен накит пред другите претставнички на „кремот’’ на бизнисот и политиката во главниот град на Индонезија.