Њујорк, 25 јули 2014 (МИА) - Генералниот секретар на Обединетите нации Бан Ки-мун апелираше до Израел и Хамас да ги прекинат судирите и остро да го осудат гранатирањето на училиште на ОН во Газа.
- Шокиран сум и вџашен од тоа што се случи во Беит Ханоун, истакна Бан, зборувајќи за северниот дел на градот Газа, каде вчера загинаа 16 луѓе, од кои седум деца.
Во нападот загинаа и претставници на ОН.
- Тоа е целосно неприфатливо. Инцидентот покажува колку е нужно да се воспостави примирје и да заврши судирот во кој загинаа 760 Палестинци. Им порачувам и на Израел и на Хамас, на Палестинците, дека е неморално да го убиваат својот народ. Морате да ги прекинете борбите и да почнете разговори. Без оглед на меѓусебните разлики, тоа е погрешно, истакна Бан пред средбата со американскиот државен секретар Џон Кери во Каиро.
Според израелските медиуми Кери подготвил нов предлог за примирје меѓу Израел и Хамас во Појасот Газа, кој е претставен на двете страни. Предлогот предвидува привремен прекин на огнот на една недела за да можат израелските сили да се повлечат од Појасот Газа. Двете страни се повикуваат да отпочнат преговори за траен договор со посредство на Египет. Во разговорите би учествувало и палестинското раководство.