ОН: Сирискиот конфликт веќе создаде три милиони бегалциЖенева, 29 август 2014 (МИА) - Над три милиони Сиријци се избегани од граѓанската војна која ја опустоши нивната земја и веќе ги претвори во бегалци, покажуваат податоците на Високиот комесаријат за бегалци.
Само во 2013 година бројот на сириски бегалци се зголемил за милион лица.
„Кризата со сириските бегалци се продлабочува. Таа денеска го мина новиот праг со рекордната бројка од три милиони лица, принудени да ги напуштат своите домови“, се наведува во сооопштението на комесаријатот.
Во оваа статистика не се вклучени стотиците илјади Сиријци кои избегале од земјата, но не се регистрирани како бегалци, дополнува комесаријатот.
Тригодишната војна во Сирија, што почна во март 2011 година, веќе го однесе животот над 191.000 лица.
Во самата Серија има околу 6,5 милиони жители кои заради војната се преместиле од едно на друго место. Тоа значи дека приближно 50 проценти од сите Сиријци биле принудени да ги напуштат своите домови. Половината од овие луѓе се деца.
Повеќето од сириските бегалци во околните земји се наоѓаат во Либан (1,14 милиона лица), во Јордан се 608.000 лица и во Турција 815.000 лица. Овој доток на луѓе врши притисок и врз економијата и врз инфраструктурата на овие држави.
Донаторите досега собраа 4,1 милијарди долари за помош на засегнатите од сирискиот конфликт, но до крајот на годината се неопходни уште две милијарди долари за да се одговори на итните потреби на сириските бегалци, посочува високиот комесаријат на ОН за бегалци.
|