Лавров и Муалем: Нема насилно решение за сирискиот конфликт

Москва, 1 септември 2014 (МИА) - Министрите за надворешни работи на Русија и Сирија, Сергеј Лавров и Валид ал Муалем, во телефонски разговор подвлекле дека не постои варијанта за насилно решение на крвавиот вооружен внатрешен конфликт во Сирија, пренесе ИТАР-ТАСС.

„Сириското Министерство за надворешни работи ја потврди подготвеноста на Дамаск да ги координира своите чекори во областа на борбата со тероризмот со претставниците на меѓународната заедница во контекст на исполнување на резолуцијата 2170 на Советот за безбедност на ОН“, соопшти руското Министерство за надворешни работи по разговорот.

„Лавров и Ал Муалем подвлекоа дека за крвавиот вооружен внатрешен конфликт во Сирија нема насилно решение и може да биде регулиран само со политички и дипломатски средства“, се додава во соопштението.

„Во врска со ова беа разменети мислења за можните форми што ќе овозможат обновување на напорите за постигнување помирување во Сирија“.

Министрите ги разгледале и последните настани во Сирија во контекст на засилената терористичка закана во земјата и во регионот од агресивните дејствија на борците на џихадистичката група „Исламска држава“.