Странските работници во Малезија под јарем на долгови

Куала Лмпур, 17 септември 2014 (МИА) – Најмалку една третина од околу 350.000 странски работници кои се ангажирани во локалните и меѓународните компании за електроника се во незавидна ситуација, најмногу поради долгови за заеми што ги зеле од работодавачите.

Ова, според заклучок на угледната американска агенција „Верите’’ за испитување на кршења на основни права на работниците, ги доведува странските работници во Малезија во состојба на современо ропство. Агенцијата „Верите’’ со канцеларии во повеќе држави ја финансира министерството за труд на САД.

Модерното ропство, како што наведуваат во американската агенција, се спроведува во индустриска гранка од која Малезија остварува приход од над 75 милијарди долари. Истражувачите особено ги загрижиле податоците дека работници од Непал, Мјанмар и Индонезија, подложени на модерно ропство, работат и во фабрики кои се дел на меѓународните корпорации „Самсунг’’, „Сони’’, „Интел’’ и „Бош’’.

Пред две недели поради лоши услови за работа во Малезија се побунија околу 1.500 работници од Непал, но нивниот обид за протести го спречи олицијата, со лаконско објаснување дека странците се задолжени да ги почитуваат малезиските прописи за работни односи.