Њујорк, 22 септември 2014 (МИА) - Американскиот претседател Барак Обама соопшти дека разузнавачките служби на САД немаат податоци дека борци од групата Исламска држава подготвуваат терористички напади во земјата.
Во статија за весникот „Тампа Беј Тајмс“, Обама пишува дека лидерите на ИД повеќе пати им се заканувале на Америка и нејзините сојузници, но дека засега нема информации за конкретни заговори на исламистите против САД.
Обама повторно нагласи дека нема намера да испрати американски копнени сили во Ирак, во борбата против екстремистите. Наместо тоа, САД ќе продолжат со поддршка на ирачките сили и создавање широка меѓународна коалиција, пишува американскиот претседател.
Според американскиот Стејт департмент, 54 земји и три организации ЕУ, НАТО и Арапската лига, веќе ветиле свој придонес во меѓународната кампања против организацијата Исламска држава.