Џакарта, 20 октомври 2014 (МИА) - Поранешниот гувернер на Џакарта, Џоко Видодо денеска положи заклетва како седми претседател на Индонезија, на церемонија во Парламентот на која присуствуваа гости од странство, меѓу кои и американскиот државен секретар Џон Кери.
- Се колнам пред Алах дека ќе ги извршуваам своите обврски на претседател на Република Индонезија на што е можно поправеденначин, вети Видодо, кој е првиот лидер во оваа земја кој не потекнува од политичката или воената елита.
Заедно со потпретседателот Јусуф Кала, во претседателскиот систем на Индонезија, Видодо ќе има значајна улога во развојот на 250-милионска држава со економија чија вредност годишно изнесува над 1.100 милијарди долари.
Претседателскиот мандат во Индонезија трае пет години, а е ограничен на два избора.
Чинот на свечената заклетва во Џакарта мина без какви и да е инциденти, но, за секој случај, над 25.000 полицајци и 15.000 војници беа подготвени да интервенираат во случај на нереди што ги најавуваа помали исламистички партии и организации, незадоволни од фактот дека на чело на најбројната муслиманска држава доаѓа христијанин.
На инугурацијата на новиот претседател на Индонезија беа присутни сите водачи на политичките партии што учествуваа на претседателските избори. Меѓу личностите што присуствуваа на церемонијата, покрај Кери, беа и премиерите на Малезија, Сингапур, Брунеи и Австралија.