ОН бараат 2,2 милијарди долари помош на Ирак

Багдад, 24 октомври 2014 (МИА) - Обединетите нации побараа одделување на 2,2 милијарди долари помош за 5,2 милиони луѓе погодени од судирите во Ирак.

- Потребите на ирачкото население се големи, изјави во Багдад координаторот на Обединетите нации за хуманитарни прашања во Ирак, Нил Рајт.

Тој наведе дека во Ирак има 1,8 милиони раселени лица, како и дека 1,7 милиони луѓе живеат во региони кои се зафатени од судири и се надвор од контрола на ирачките власти.

- За околу 2,8 милиони луѓе потребна е помош во храна, а за 800.000 итно е потребно сместување, истакна Рајт, додавајќи дека во услови кога зимата е на самиот праг, во планинските предели, каде што се наоѓаат поголемиот дел од раселените лица, се очекува намалување на температурата.

Според податоците на ОН, освен 1,8 милиони раселени Ирачани, на ирачка територија се наоѓаат и уште најмалку 200.000 бегалци од Сирија.