Либискиот парламент е подготвен да преговара со алтернативната влада

Триполи, 30 октомври 2014 (МИА) - Меѓународно признатиот либиски премиер Абдулах ал Тани изјави дека е подготвен за мировни преговори со властите во Триполи, откако во нови судири во Бенгази животот го загубија над 20 лица. 

Либија има две влади и два парламенти, откако милиции во август годинава го преземаа главниот град Триполи, создавајќи сопствен кабинет и народно собрание. Меѓународно признатата влада се состанува во градот Тобрук. 

Ал Тани постави само еден услов за преговорите со втората Влада. - Отвораме врата за дијалог со нашите браќа под услов, дека ќе има отстапки од сите страни, изјави тој пред медиумите во Картум, пред крајот на тридневната посета на Судан. 

Либија е на работ од граѓанска војна, бидејќи властите се премногу слаби за да ги контролираат бунтовниците, кои помогнаа во соборување на Моамер Гадафи во 2011 година и кои сега ги оспоруваат државните власти, земајќи дел од приходите од нафта.